حیدربابا قسمت سوم
از منظومه «حیدربابایه سلام» از زنده یاد استاد محمد حسین شهریار
حیدربابا سولی یرین دوزنده،
بولاخ قینر چای – چمنین گوزونده،
بولاخ اوتی، اوزه ر سویون اوزنده،
گوزل قوشلار اوردان گلیب گچللر،
خلوتلیوب، بولاخدان سو ایچللر.
بیچین اوستی، سنبل بیچن اوراخلار،
ایله بیل که زلفی دارار داراخلار،
شکارچیلار بیلدیرچینی سوراخلار،
بیچین چیلر آیرانلارین ایچللر.
بیر هوشلانیب، سوندان دوروب بیچللر.
حیدربابا، کندین گونی باتاندا،
اوشاقلارون شامین ییوب یاتاندا،
آی بولوتدان چیخوب قاش – گوز آتاندا،
بیزدن ده بیر سن اولارا قصه ده،
قصه میز ده چوخلی غم وغصه ده.
قاری ننه گئجه ناغیل دینده،
کولک قالخیب قاب – باجانی دوینده،
قورد گئیچنین شنگلیسین یینده،
من قاییدیب،بیر اوشاق اولیدیم!
بیر گل آچیب، اوندان سوراسولیدیم!
عمه جانین، بال بلله سین ییه ردیم،
سوندان دوروب، اوس دونومی گییه ردیم،
باخچالاردا تیرینگی دییه ردیم،
آی ئوزومی او ازدیرن گونلریم!
آغاچ مینوب، آت گزیدن گونلریم!
هچی خالا چایدا پالتار یوواردی،
ممدصادق داملارینی سوواردی،
هچ بیلمزدیک داغدی، داشدی، دوواردی،
هریان گلدی، شیلاغ آتوب آشاردیق!
شیخ السلام، مناجاتی دییه ردی،
مشد رحیم لباده نی گییه ردی،
مشد آجلی ببوز باشلاری ییه ردی،
بیزخوشودوق خیرات اولسون، توی اولسون،
فرق ایله مز، هرنولاجاق، قوی اولسون!
ملک نیاز ورندلین سالاردی،
آتین چاپوب، قیقاجیدان چالاردی،
قیرقی تکین، گدیک باشین آلاردی،
دولائیا قیزلار آچیب پنجره،
پنجره لرده نه گوزل منظره!
حیدربابا، کندین تویون توتاندا،
قیز – گلینلر حنا، پیلته ساتاندا،
بیک گلینه دامنان آلما آتاندا،
منیم ده او قیزلاروندا گوزوم وار،
عاشیقلارین سازلاریندا سوزوم وار.
درود و هزاران درود بر روان پاک و بلندش
بنام خداوند جان و خرد